Alarmi fals për bombë tek “Petro Nini Luarasi”, arrestohet 17-vjeçari dhe 2 shokë të tij

Policia e Tiranës ka arrestuar mëngjesin e sotëm një 17-vjeçar, që dyshohet si personi që përhapi panik, duke sinjalizuar policinë për lëndë eksplozive, që në fund rezultoi fals.

Burime policore njoftojnë se është arrestuar në  flagrancë shtetasi  E. V, 17 vjeç, lindur dhe banues në Tiranë, për veprën penale “Përhapje e Informatave të rreme që ngjallin panik” dhe “Njoftim i rremë në organet e rendit”, si edhe nisi procedimi në gjendje të lirë për shtetasit G.K, 17 vjeç dhe F.Ç., për “Moskallëzim krimi”.

Kujtojmë ditën e mërkurë rreth orës 10:50 u mor njoftim se në shkollën “Petro Nini Luarasi” në Tiranë, ngjitur me murin rrethues u gjet një çantë ku brenda saj dyshohej se kishte lëndë eksplozive.Menjëherë në vendngjarje shkoi Policia dhe Specialistët e Njësisë Antieksploziv. Pas verifikimeve rezultoi se ishte një alarm fals. Gjatë hetimeve dhe punës operative rezultoi se çanta e gjetur në trotuarin ngjitur me murin e shkollës “Petro Nini Luarasi” në rrugën “Sami Frashëri” ishte vendosur dhe njoftuar vetë nga shtetasi E. V., 17 vjeç.

Materialet do t’i kalojnë Prokurorisë së Rrethit Gjyqesor Tiranë për veprën penale  “Përhapje e Informatave të rreme që ngjallin panik” dhe “Njoftim i rremë në organet e rendit” parashikuar nga nenet 267 dhe 272 të Kodit Penal në ngarkim të arrestuarit E. V.,  dhe “Moskallzim krimi” parashikuar nga neni 300 i Kodit Penal në ngarkim të shtetasve G.K dhe F. Ç.

Policia e Tiranës është duke punuar intensivisht për evidentimin dhe arrestimin e autorëve për të gjitha rastet e alarmeve fals të ndodhura ditët e fundit, të cilat kanë për qëllim përhapjen e panikut tek qytetarët .