Analistët: Plani i SHBA-së për lehtësimin e sanksioneve ndaj flotës hije vështirë se do të shtojë cisternat në treg

Plani i mundshëm i administratës Trump për lehtësimin e sanksioneve ndaj anijeve që kanë transportuar naftë dhe karburante të sanksionuara ka gjasa të ketë ndikim të kufizuar në rritjen e disponueshmërisë së cisternave, thanë të enjten tregtarë dhe analistë, siç raporton Reuters.

Diskutimet janë ideja më e fundit që administrata po shqyrton për të ulur çmimet e karburanteve dhe inflacionin. Tarifat e transportit detar janë rritur ndjeshëm javët e fundit, për shkak të sulmeve, kostove të larta të sigurimit nga rreziku i luftës dhe operacioneve të ndërlikuara për nxjerrjen e naftës nga Ngushtica e Hormuzit, të cilat kanë pakësuar anijet e disponueshme.

Firma e gjurmimit detar Kpler vlerëson se masa do të kishte praktikisht asnjë ndikim në krizën aktuale të cisternave. Kpler monitoron rreth 160 supercisterna nën sanksione amerikane — rreth 22 për qind e flotës tregtare — por 46 prej tyre janë mbi 20 vjeçare. Kur merret parasysh mosha dhe përjashtohen cisternat e Kompanisë Kombëtare Iraniane të Cisternave, vetëm rreth 24 anije mund të rikthehen në tregtinë globale.

Sipas David Tannenbaum, drejtor i firmës këshilluese Blackstone Compliance Services dhe ish-specialist i sanksioneve në Thesarin amerikan, kompanitë vështirë se do të marrin me qira cisterna që sapo kanë dalë nga sanksionet: për anijet e tregtisë ruse vazhdojnë sanksionet e Bashkimit Evropian, ndërsa për ato të lidhura me Iranin mbetet një barrë e madhe ligjore, pasi anijet u sanksionuan për mbështetje të një organizate terroriste. Licencat e nevojshme për rimarrjen apo shitjen e një cisterne të flotës hije kërkojnë zakonisht muaj, në mos vite, shtoi ai.

Anijet e flotës hije shpesh nuk kanë as certifikata klasi nga organe të pavarura inspektimi dhe as sigurim nga organizata të besueshme globale, çka i bën ato pak tërheqëse për tregun e rregullt. Megjithatë, vetë lajmi për një lehtësim të mundshëm i uli kontratat e ardhshme të tarifave detare: kostoja e marrjes me qira e një anijeje Aframax nga Bregu i Gjirit të SHBA-së drejt Evropës ra dukshëm, ndërsa zbritja e naftës amerikane WTI ndaj Brent-it u ngushtua në rreth 10.42 dollarë.

Nga ana e saj, Departamenti amerikan i Energjisë tha se çdo lëvizje për lehtësimin e sanksioneve ndaj flotës hije nuk do ta ndihmonte Rusinë të lëvizë naftën e saj. Një zyrtar amerikan, që foli në kushte anonimiteti, tha se diskutimet kanë të bëjnë me heqjen e sanksioneve rast pas rasti, në mënyrë që anijet t’u kalojnë operatorëve legjitimë dhe të transportojnë më shumë naftë të pasanksionuar.