ArcelorMittal pranon 1 miliard dollarë humbje: sulmet raketore ruse e pamundësojnë rifillimin e uzinës në Kryvyi Rih

Gjiganti i çelikut ArcelorMittal njoftoi të premten se pret të regjistrojë një humbje zhvlerësimi jo-cash prej rreth 1 miliard dollarësh, kryesisht për pronën, pajisjet dhe impiantin në njësinë e saj ArcelorMittal Kryvyi Rih në Ukrainë.

Kompania i ka komunikuar qeverisë ukrainase se nuk është në gjendje të rifillojë operimet në njësinë e Kryvyi Rih-ut në mënyrë të sigurt dhe të qëndrueshme, pas sulmeve të përsëritura raketore ruse që kanë goditur uzinën.

Sipas njoftimit të kompanisë, në pesë javët e fundit impianti ka qenë shënjestër e katër sulmeve raketore, që kanë lënë pesë të vdekur dhe 17 të plagosur. Si pasojë e dëmtimeve, prodhimi primar i çelikut është ndalur plotësisht.

ArcelorMittal ka ofruar deri më tani mbi 700 milionë dollarë mbështetje financiare për njësinë e Kryvyi Rih-ut dhe në deklaratën e saj lavdëron rezistencën e jashtëzakonshme të punonjësve gjatë gjithë periudhës së konfliktit.

Kjo nuk është hera e parë që kompania regjistron humbje nga lufta në Ukrainë: ajo kishte shënuar tashmë një humbje prej rreth 1 miliard dollarësh në vitin 2022 për operimet e saj në vend.

ArcelorMittal është një ndër kompanitë më të mëdha të çelikut në botë, e pranishme në 60 vende. Në vitin 2025 gjeneroi të ardhura prej 61.4 miliardë dollarësh dhe prodhoi 55.6 milionë tonë çelik.

Burimi: Reuters