Armando Prenga vetëpezullohet nga Kuvendi

Deputeti socialist, Armando Prenga ka vendosur të mos shkojë më në Kuvend, deri në vendimin përfundimtar të Gjykatës së Lartë që do të japë ndaj tij, në lidhje me plagosjen e ndodhur për shkak të konfliktit të Lagunës së Patokut.

Vendimi është marrë nga vetë deputeti i cili e ka pezulluar veten e tij. Prenga u arrestua pas plagosjeve të ndodhura në Laç në lidhje me konfliktin e lagunës së Patokut, ndërsa gjykata e Lartë vendosi ndaj tij masën e sigurisë “detyrim paraqitje”, pak ditë më parë.

Prenga u paraqit të hënën dhe të martën në Kuvend duke sjellë reagimin e opozitës dhe ndërkombëtarëve.

 

Letra e Armando Prengës:

I nderuar Kryetar i Kuvendit

Duke marrë shkas nga deklarimet e përfaqësuesve të Partisë Demokratikedëshiroj tiu bëj me dije vendimin tim për tu vetëpezulluar nga aktiviteti i Parlamentit të Shqipërisë, deri në marrjen e një vendimi gjyqësor për çështjen në të cilën unë jam i përfshirë. Edhe pse plotësisht i bindur në pafajësinë time, dëshiroj të mbetem larg jetës parlamentare për sa kohë Sali Berisha dhe Lulzim Basha, që duuhet të ishin përpara drejtësisë, më kanë kthyer në tabelë qitje siç e kanë zakon se nuk dinë të bëjnë punë tjetër. Unë nuk dua t’i jap kosto të tjera shpirtërore familjes time dhe të afërmve të mi. Ata nuk ma kanë borxh baltën e Saliut dhe të Lulit edhe pse janë të bindur në pafajësinë time. Prandaj, unë do të vazhdoj deri në fund betejën gjyqësore, ndërkohë që Partia Demokratike le të mbajë të dënuarin Xhelal Mziu si hero të partisë në luftën për demokraci.

Sinqerisht Armando Prenga