Arrest në burg pa afat për 4 të akuzuar për trafik armësh në Tiranë

Gjykata Penale e Tiranës ka caktuar masat e sigurimit “arrest në burg” për 4 personat e arrestuar disa ditë më parë në Tiranë për trafikim armësh. Në qeli kanë mbetur M.V, E.M, F.Z dhe K.B. Gjatë seancës ata nuk kanë folur para gjykatës.

Ndërkohë, nga ana tjetër, prokuroria pretendon se gjithçka është e dokumentuar në bazë të blerjeve të simuluara nga agjentët e infiltruar.

Gjatë operacionit të zhvilluar nga policia janë sekuestruar në cilësinë e provës materiale 4 pistoleta dhe 3 kallashnikovë, me vlerë 1 mijë e 500 deri në 2 mijë e 500 euro, si dhe municione, celularë dhe sende të tjera me vlerë për hetimin.

Armët janë dërguar në laboratorin e Policisë Shkencore për t’iu nënshtruar ekzaminimit nëse janë apo jo funksionale dhe nëse janë përdorur në ngjarje kriminale.

Ky grup kriminal ka qenë nën hetim prej kohësh nga strukturat ligjzbatuese. Drejtues i grupit kriminal dyshohet K.V, i cili është shpallur në kërkim së bashku me B.A.

Hetimet po vijojnë nga grupi hetimor në lidhje me këtë çështje.

/tvklan.al