Arrestohen tre gazetarë të Al-Jazeera-s për fluturimin e një droni mbi Paris

Tre gazetarë të kanalit televiziv Al-Jazeera u arrestuan pasi kishin hedhur një dron sot pasdite në një park në Paris, njoftojnë burime të afërta me hetimin.

”I pari drejtonte dronin, i dyti e filmonte, ndërsa i treti shikonte”, njoftoi një burim.

Gazetarët janë ndaluar në pyllin e Bulonjës, në perëndim të Parisit.

Sipas njërit prej burimeve, “nuk ekziston për momentin asnjë lidhje mes këtyre arrestimeve dhe fluturimit të dronëve mbrëmjeve në Paris që i shqetëson autoritetet”.

Fluturime dronësh u panë sërish gjatë natës së djeshme rreth orës 22:22 dhe 01:00 GMT në Paris.

Këta dronë, numri i të cilëve nuk dihet, janë parë nga dëshmitarë dhe policë, veçanërisht në sheshin ”Concorde”, në afërsi të së cilit ndodhet ambasada amerikane.

Këto mjete të vogla fluturuese të telekomanduara u panë gjithashtu përgjatë lumit të Senës, në afërsi të ”Invalides”, kullës Eiffel dhe në disa vende të tjera duke përfshirë Saint-Cloud (jugperëndim) dhe Clignancourt (veri).

Drejtësia hapi dje një hetim për ”fluturim të avionëve pa pilot në zona të ndaluara”.

Një muaj më parë, më 20 janar, Elyse-ja, selia e presidencës franceze, ishte skenë e një fluturimi droni, por asnjëherë nuk ishin parë kaq shumë dronë në një natë.