Arti i ikonave shqiptare, mbrëmje e veçantë diskutimesh në Muzeun e Luvrit

Në Muzeun e Luvrit, një prej tempujve më të mëdhenj të kulturës botërore, iu kushtua një mbrëmje e veçantë trashëgimisë shqiptare, përmes një konference për bashkëpunimin kulturor dhe shkencor mes Shqipërisë dhe Francës.

Ekspozita “Ikonat e Shqipërisë, thesare të Muzeut Kombëtar të Artit Mesjetar të Korçës”, aktualisht e paraqitur në Muzeun e Arteve të Bukura të Chambéry-së, u bë pikënisje për një diskutim të rëndësishëm mbi trashëgiminë, kërkimin shkencor dhe lidhjet kulturore mes dy vendeve.

Nën titullin domethënës “Kur diplomacia ndërkombëtare frymëzon kërkimin shkencor”, Nicolas Bousquet, drejtor i muzeve të Chambéry-së, solli historinë e kësaj ekspozite, të lindur nga binjakëzimi ndërmjet Korçës dhe Chambéry-së dhe nga bashkëpunimi i ngushtë me Muzeun Kombëtar të Artit Mesjetar të Korçës.

Maximilien Durand, specialist i shquar dhe drejtor i Departamentit të Arteve të Bizantit dhe të Krishterimeve të Lindjes në Muzeun e Luvrit, i ofroi publikut një rrugëtim të jashtëzakonshëm në historinë e pikturës bizantine dhe pasbizantine në Shqipëri, duke ndriçuar pasurinë artistike të veprave të paraqitura dhe perspektivat e reja shkencore që studimi i tyre ka hapur në bashkëpunim me specialistët shqiptarë.

Fakti që kjo trashëgimi u prezantua pikërisht në Muzeun e Luvrit i jep kësaj mbrëmjeje një domethënie të veçantë. Në një prej institucioneve më prestigjioze të botës së artit, historia dhe arti shqiptar u bënë pjesë e një dialogu më të gjerë evropian mbi kulturën, dijen dhe trashëgiminë e përbashkët.

I pranishëm në këtë takim, ambasadori i Shqipërisë Dritan Tola shprehu nderin dhe emocionin që trashëgimia shqiptare vlerësohet dhe promovohet në këtë mënyrë në Muzeun e Luvrit, duke përshëndetur ngrohtësisht dy konferencierët:

“Kur diplomacia krijon ura ndërmjet institucioneve dhe popujve, ajo bëhet gjithaq burim frymëzimi për kërkimin shkencor, dijen dhe rizbulimin e trashëgimisë sonë të përbashkët evropiane”, u shpreh ambasadori Tola.

Muzeu Kombëtar i Artit Mesjetar shprehu falënderime për Maximilien Durand dhe Nicolas Bousquet për pasionin dhe punën e tyre të jashtëzakonshme, si dhe për Françoise Mardrus, Drejtore e Studimeve Muzeale në Muzeun e Luvrit, për mikpritjen e kësaj etape të bukur të një aventure kulturore që lidh Shqipërinë, Francën dhe Evropën.