Atentat ndaj Trump? Mossad-i paralajmëron CIA-n për kërcënimin e Iranit, kufizohen daljet e presidentit

Siç njofton Shqiptarja.com, duke iu referuar raportimit të gazetës izraelite Israel Hayom, inteligjenca izraelite Mossad ka paralajmëruar Agjencinë Qendrore të Inteligjencës së Shteteve të Bashkuara (CIA) për një kërcënim të dyshuar iranian. Sipas raportimit, i cili i atribuohet zyrtarëve të lartë izraelitë dhe amerikanë, të cilët nuk identifikohen me emër, Mossad-i i ka përcjellë CIA-s informacione të inteligjencës për planet e dyshuara të Iranit.

Sipas raportimit, Irani dyshohet se po planifikon të vrasë presidentin amerikan Donald Trump dhe disa zyrtarë të lartë të administratës së tij, si hakmarrje për sulmet amerikane të qershorit kundër objekteve bërthamore iraniane. Në shënjestër dyshohet se janë edhe zyrtarët përgjegjës për vrasjen në vitin 2020 të gjeneralit iranian Qasem Soleimani.

Si pasojë e kërcënimit të dyshuar, daljet publike të presidentit Trump janë kufizuar. Ai rrallë ka dalë nga Shtëpia e Bardhë, përveç udhëtimeve të shkurtra në fushat e golfit në Virginia dhe Florida, nën masa të rrepta sigurie. Zyrtarë të lartë amerikanë, aktualë dhe ish-zyrtarë, janë vendosur nën mbrojtje të veçantë dhe janë zhvendosur në objekte të sigurta, ndërsa Shërbimi Sekret ka shtuar masat e sigurisë.

Zëdhënësi i Këshillit të Sigurisë Kombëtare, Brian Hughes, tha se Shtetet e Bashkuara kanë marrë dhe vazhdojnë të marrin të gjitha masat e nevojshme për të mbrojtur njerëzit e tyre, përfshirë ish-zyrtarët, dhe se Irani do të përballet me pasoja serioze nëse sulmon ndonjë amerikan. Trump vetë ka thënë se nëse Irani do të përpiqej ta vriste, ai vend do të shkatërrohej.