Teherani: asnjë bisedim bërthamor me SHBA-në — “nuk jemi fare në atë fazë”

Irani nuk po zhvillon asnjë bisedim mbi detajet e çështjes bërthamore me Shtetet e Bashkuara, siç njofton Al Jazeera në mbulimin e saj të drejtpërdrejtë të luftës. Deklarata u bë të dielën nga zëdhënësi i Ministrisë së Jashtme iraniane, Esmail Baghaei.

I pyetur nëse Teherani do të pranonte një pezullim të përkohshëm të pasurimit të uraniumit ose një ulje të niveleve të pasurimit si pjesë e një marrëveshjeje të mundshme me Uashingtonin, Baghaei u përgjigj shkurt: “Jo, nuk jemi fare në atë fazë tani.”

“Gjatë kësaj periudhe nuk kemi pasur asnjë diskutim mbi detajet që lidhen me çështjen bërthamore”, shtoi zëdhënësi, duke mbyllur kështu derën për spekulimet se një marrëveshje e përkohshme mbi programin bërthamor iranian mund të jetë duke u negociuar në prapaskenë.

Pasurimi i uraniumit ka qenë prej kohësh pika më e ndjeshme e përplasjes mes Teheranit dhe Uashingtonit. Me këtë deklaratë, pala iraniane bën të qartë se, të paktën për momentin, nuk ka asnjë proces negociues mbi thelbin e programit bërthamor, ndërsa lufta mes dy vendeve vazhdon.