Avokati i Popullit në burgun e Pojskës: Verifikim për nënën që qëndron me foshnjën 4-muajshe

Avokati i Popullit ka ngritur një grup pune për të verifikuar situatën e Greta Gjocit, 33 vjeçe, e cila ndodhet në IEVP Pojskë së bashku me fëmijën e saj 4-muajsh.

Gloria Carkaxhiu, e cila ishte pjesë e grupit të punës, tha se është verifikuar nga afër situata e nënës dhe foshnjës, si dhe kushtet ku ato janë akomoduar.

Sipas saj, kushtet në institucion janë të përshtatura për nevojat e nënës dhe fëmijës, ndërsa në IEVP Pojskë ka edhe një ambient të posaçëm, ku nënat mund të qëndrojnë së bashku me fëmijët.

Carkaxhiu sqaroi se Greta Gjoci nuk ka paraqitur ankesa specifike për kushtet e qëndrimit, ndërsa Avokati i Popullit do të vijojë mbledhjen e dokumentacionit dhe verifikimin e situatës.

Sa i përket çështjes gjyqësore, ajo theksoi se Avokati i Popullit nuk mund të ndërhyjë në vendimmarrjen e gjykatave. Kompetenca e institucionit është verifikimi i respektimit të të drejtave dhe lirive themelore të personave që ndodhen në IEVP.

Carkaxhiu u pyet edhe për gratë e tjera që kanë kërkuar pezullimin e vendimeve për shkak të fëmijëve të mitur. Ajo tha se këto janë procedura që ndiqen nga vetë gratë dhe avokatët e tyre pranë gjykatave.

Avokati i Popullit, sipas saj, do të fokusohet në vlerësimin e kushteve dhe trajtimit njerëzor të nënës dhe fëmijës brenda institucionit, ndërsa pas mbledhjes së dokumentacionit dhe provave do të bëjë vlerësimin përkatës.