Kryetari i grupit parlamentar të Partisë Socialiste, Taulant Balla ftoi sot SPAK që të hetojë dosjen e kompleksit “Partizani”, si një skandal të tjetërsimit të pronave dhe korrupsionit.
Gjatë fjalës së tij në Kuvend, Balla u shpreh se Sali Berisha është shpallur “non grata” nga SHBA për korrupsion, por SPAK është ende duke kërkuar prova.
“Provat janë aty. Unë kam çuar prova përditë, edhe për kompleksin ‘Partizani’. Më kanë thënë se kanë regjistruar procedim penal për kompleksin ‘Partizani’, por unë jam kallëzuesi dhe nuk jam thirrur deri tani. Një privatizim që u bë për 100 milionë lekë, aq sa shitet sot aty vetëm një apartament. Ne duhet të bëjmë çmos që drejtësia të funksionojë dhe ‘djallin’ ta pastrojë edhe nga Kuvendi, nga kjo strehë e fundit ku fshihet, sepse nga sistemi i drejtësisë po e pastrojmë”, tha Balla.
Balla tha se “mazhoranca e ka bërë të qartë qëndrimin kur drejtësia ngre akuzë ndaj një përfaqësuesi të PS-së”.
“Ne s’do të jemi e s‘kemi qenë zyrë avokatie për ndonjë përfaqësues tonin. Viti 2021 është viti i parë kur në Shqipëri janë marrë masa, janë dënuar ministra të mazhorancës në pushtet. Ky është rezultati i vërtetë”, shtoi ai.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.