Balla për protestën: Shqipëria nuk kthehet më te dhuna e ’97-ës. Disa protestues paguhen nga shërbimet e huaja për të dëmtuar sezonin turistik dhe ekonominë

Kreu i grupit parlamentar të Partisë Socialiste, Taulant Balla, ka reaguar jashtë Kuvendit për protestën dhe përplasjet e ndodhura mes protestuesve dhe Policisë së Shtetit, duke thëne se “dështimi i këtij tubimi po kalon në akte dhune”.

Balla akuzoi gjithashtu organizatorët e protestës se paguhen nga shërbime të huaja dhe synojnë të dëmtojnë imazhin e Shqipërisë, veçanërisht gjatë sezonit turistik.

“Unë nuk kam dyshime që e gjithë kjo strategji e një protestë që në dështim e sipër ka shkuar të apelojë te dhuna e përsëritur. Për ta kthyer pas vendin në skenarët e dhunës së vitit 1997 nuk do të ketë mundësi. I gjithë synimi është të dëmtohet sezoni turistik dhe ekonomia. Janë imazhe që bëjnë xhiron e botës pikërisht për të dëmtuar imazhin dhe ekonominë e vendit. Ka persona brenda në protestë që janë pjesë e listapagesave të shërbimeve të huaja që duam të dëmtojnë imazhin dhe ekonominë e Shqipërisë”, tha Balla.

Ai shprehu solidaritet të plotë me efektivët e policisë të lënduar gjatë përplasjeve dhe kërkoi nga drejtësia që të vlerësojë masat ndaj personave të përfshirë në akte dhune.

“Shpreh solidarizim të plotë me policinë dhe i bëj thirrje drejtësisë që të vlerësojë të gjitha ato masa të dhëna, sepse në një vend si Shqipëria, vend anëtar i NATO-s, nuk mund të tolerohet dhuna. Çdo person që godet policinë, godet vetë shtetin”, tha Balla.

Sipas tij, ajo që ka ndodhur gjatë protestës nuk mund të konsiderohet thjesht një reagim simbolik, por përbën akte të dhunshme ndaj institucioneve.

“Këtu nuk bëhet thjesht me vezë, por bëhet fjalë për akte dhune barbare”, u shpreh ai.