Barbie bëhet inteligjente, ja si do ndryshojë kukulla më e dashur e vajzave

Barbie bëhet inteligjente, por mbi të gjitha teknologjike. Kukulla më e preferuar e vajzave ndër vite do të vijë me një version të lidhur me internetin, por jo vetëm.

Shtëpia prodhuese “Mattel” po bashkëpunon me kompaninë kaliforniane ToyTalk për të zhvilluar ”Hello Barbie”, e cila do jetë në gjendje që të flasë duke shfrytëzuar një platformë që njeh zërin.

Prototipi dixhital i kukullës Barbie u prezantua pak ditë më parë në Shtetet e Bashkuara të Amerikës gjatë panairit të lodrave në New York.

“Kërkesa numër një që vjen për kukullat tona nga e gjithë bota është që ato të mund të bisedojnë. Tani për herë të parë do të jetë e mundur një gjë e tillë”, shpjegon për BBC zëdhënësja e “Mattel”.

“Hello Barbie” do të jetë në gjendje që të luajë në mënyrë interaktive, por edhe të tregojë përralla dhe barcaleta.

Barbie do të dëgjojë bisedat e të vegjëlve dhe do të arrijë që t’iu përgjigjet. Versioni i ri kërkon një lidhje me Wi-Fi me internetin dhe do të përmbajë një mikrofon, altoporlant dhe drita të vogla led, ndërsa bateritë e karikueshme do të jenë të vendosura në pjesën e këmbëve.

Deri më tani nuk ka ende një datë zyrtare për daljen e saj në treg, megjithëse parashikohet që të jetë gati për Krishtlindje, për një çmim prej 75 dollarësh.