Basha i vendosur: S’pranoj pazare, s’ka zgjedhje as më 30 gusht

Në kushtet kur në vend siç tha kryedemokrati Lulzim Basha nuk mund të mbahen zgjedhjet vendore, por as të shkarkohet Presidenti, ai u shpreh se nuk do të pranojë asnjë pazar apo marrëveshje.

Zgjedhjet sipas Bashës, do të pasqyrojnë vetëm vullnetin e popullit dhe është e pamundur që kjo të ndodhë deri më 30 gusht.

“Në demokraci, zgjedhjet janë instrumenti se si njerëzit zgjedhin qeverinë dhe qeverisjen që duan. Zgjedhjet janë mekanizmi se si vullneti i njerëzve përkthehet në institucionet qeverisëse. Por ama, është e qartë për këdo, se në kushtet e sotme nuk ka asnjë mundësi që vullneti i popullit të diktojë parlamentin dhe qeverisjen përmes zgjedhjeve të lira dhe të ndershme. As me 30 qershor, as me 30 korrik, as me 30 gusht. Jo përpara se të largohet Edi Rama nga kryeministër, dhe jo para se Vangjush Dako, Damian Gjiknuri dhe dhjetëra funksionarë socialistë dhe bashkëpunëtorët e tyre të botës së krimit të dalin para drejtësisë për vjedhjen e zgjedhjeve, për shkatërrimin e themelit të rendit demokratik”,- tha ai.