Gjashtë shoferë të ndaluar në 24 orë: pa patentë, të dehur dhe njëri në drejtim të kundërt

Gjatë 24 orëve të fundit, policia ka ndaluar gjashtë shoferë në lokacione të ndryshme të vendit për veprën penale “drejtim i pamatur i mjetit motorik”, sipas nenit 297-a të Kodit Penal, siç njofton Hype TV, duke iu referuar Ministrisë së Punëve të Brendshme.

Tre prej tyre drejtonin automjetin pa dhënë provimin e patentës së shoferit: B.M. (34) nga fshati Batinci i Shkupit, një 16-vjeçar nga fshati Morani i Shkupit dhe F.K. (32) nga fshati Golemo Konjari i Prilepit, i cili njëkohësisht drejtonte nën ndikimin e alkoolit.

Nën ndikimin e alkoolit drejtonte edhe S.A. (53) nga fshati Grad i Dellçevës, i cili më parë kishte shkaktuar një aksident trafiku me dëme materiale, ndërsa A.A. (38) nga Prilepi drejtonte pavarësisht ndalimit aktiv për drejtim automjeti dhe gjithashtu nën ndikimin e alkoolit.

M.E. (66) nga rrethina e Tetovës, ndërkaq, drejtonte automjetin në drejtim të kundërt. Pas dokumentimit të plotë të rasteve, ndaj të gjithë shoferëve do të ngrihen kallëzimet penale përkatëse.

MPB-ja apelon që të gjithë pjesëmarrësit në trafik t’i respektojnë rregullat dhe rregulloret e trafikut: të mos drejtojnë automjet pa patentë, nën ndikimin e alkoolit ose me ndalim aktiv, dhe rikujton se mosrespektimi i drejtimit të caktuar të lëvizjes mund ta rrezikojë seriozisht sigurinë në trafik.