Ulqin: Policia i sekuestron përkohësisht BMW-në 16-vjeçarit nga Kosova, ngiste pa patentë dhe me alkool

Policia e Ulqinit ka zhvilluar gjatë fundjavës kontrolle të shtuara të pjesëmarrësve në trafik, gjatë të cilave një 16-vjeçari iu hoq përkohësisht automjeti BMW, siç njofton portali CdM, duke iu referuar Drejtorisë së Policisë së Malit të Zi.

Sipas policisë, janë kontrolluar 104 persona dhe 94 automjete, ndërsa të gjithë shoferët e kontrolluar iu nënshtruan alkotestit. Gjithsej u sanksionuan 49 shoferë: për 42 u lëshuan urdhra kundërvajtës, ndërsa kundër shtatë personave u ngritën kallëzime kundërvajtëse. U kontrolluan edhe tre persona me interes operativ, dy prej të cilëve u sanksionuan.

Automjeti BMW iu hoq të miturit 16-vjeçar, shtetas i Kosovës me qëndrim të përhershëm në Ulqin. Sipas raportimit të CdM-së, ai u sanksionua sepse ngiste automjetin pa dhënë provimin e patentës, ngiste pas mesnatës, automjeti kishte fuqi motori mbi 80 kW, si dhe ngiste nën ndikimin e alkoolit, në përqendrim 0,22 g/kg.

Po ashtu, më 31 tetor, në kuadër të aksionit “Matja e shpejtësisë në mënyrë automatike”, në rrugën rajonale Ulqin–Ada, në Bulevardin Teuta, u sanksionuan pesë shoferë për tejkalim të shpejtësisë së lejuar, ndërsa në aksionin kombëtar “Rripi” u lëshuan 39 urdhra kundërvajtës për mospërdorimin e rripit të sigurimit, njoftoi policia.