“BBC” zbulon identitetin e “mbretit” të gomoneve drejt Britanisë, kush është kontrabandisti që kërkohet nga policia evropiane

Një investigim i BBC News ka zbuluar identitetin e vërtetë të një prej kontrabandistëve më të fuqishëm të emigrantëve, rrjeti i të cilit besohet se ka organizuar shumicën e kalimeve ilegale me gomone drejt Mbretërisë së Bashkuar në vitet e fundit.

Bëhet fjalë për një kurd irakian 28-vjeçar, i njohur me pseudonimin “Kardo Ranya”, i cili për vite me radhë kishte shmangur arrestimin duke mbajtur sekret identitetin e tij të vërtetë. Sipas investigimit, emri i tij real është Kardo Muhammad Amen Jaf.

Gazetarët e BBC-së arritën të gjurmojnë aktivitetin e tij nga kampet e emigrantëve në veri të Francës deri në Kurdistanin irakian, duke përdorur kontakte në botën e kontrabandës së emigrantëve.

Sipas autoriteteve britanike, rrjeti i tij operonte në një itinerar që shtrihej nga Afganistani deri në Britani. Zyrtarë të Agjencisë Kombëtare Britanike kundër Krimit (NCA) deklaruan se shumica e modelit kriminal të kalimeve me gomone kontrollohet nga grupe kurde të lidhura me rajonin e Ranyas në Kurdistanin irakian.

Investigimi zbulon se “Kardo Ranya” promovonte aktivitetin e tij edhe në rrjetet sociale, ku publikonte video që premtonin një jetë luksoze në Londër dhe dëshmi të emigrantëve që kishin mbërritur me sukses në Britani.

Sipas një ish-kontrabandisti, rrjeti kërkonte deri në 17 mijë euro për të transportuar një emigrant nga Iraku në Britani, duke pretenduar se ofronte një rrugë më të sigurt dhe shërbim “VIP”.

Megjithatë, udhëtimet shpesh kanë rezultuar fatale. BBC sjell rastin e një 24-vjeçari nga Ranya, i quajtur Shwana, i cili u zhduk gjatë një kalimi në Kanalin Anglez pasi gomonia me mbi 100 persona nisi të fundosej. Trupi i tij nuk u gjet kurrë.

Familjarët e tij thanë se ishte ndikuar nga reklamat e kontrabandistëve që premtonin një jetë më të mirë në Britani.

Gjatë investigimit, gazetarët kontaktuan drejtpërdrejt me Jaf përmes WhatsApp-it, duke u paraqitur si emigrantë të interesuar për të udhëtuar drejt Britanisë. Një bashkëpunëtor i tij ofroi një paketë “VIP” për 160 mijë paund për një familje të tërë.

Kur u përball me akuzat, Jaf mohoi të ishte kontrabandist dhe pretendoi se vetëm u jepte njerëzve këshilla se si të largoheshin nga Iraku. Ai gjithashtu mohoi përfshirjen në tragjedinë ku humbi jetën i riu Shwana.

Sipas BBC-së, një prej bashkëpunëtorëve të tij, Noah Aaron, është dënuar së fundmi me 10 vite burg në Francë për organizim të emigracionit ilegal dhe pastrim parash.

Aktualisht, Kardo Muhammad Amen Jaf kërkohet për t’u marrë në pyetje nga të paktën një forcë policore evropiane, ndërsa vendndodhja e tij mbetet e panjohur.