BDI i kërkon dorëheqjen ministrit Jeton Shasivari për provimin juridik në shqip
BDI akuzon ministrin e Drejtësisë se për të drejtën konkrete të studentëve shqiptarë kërkon kohë e konsultime, ndërsa për aktgjykimin e Hagës ndaj ish-udhëheqësve të UÇK-së reagoi para se ai të publikohej.
Bashkimi Demokratik për Integrim (BDI) i ka kërkuar dorëheqjen ministrit të Drejtësisë, Jeton Shasivari, për shkak të provimit juridik në gjuhën shqipe.
Sipas BDI-së, pavarësisht kërkesave të përsëritura të studentëve dhe protestave, ministrit i duhen kohë, konsultime dhe deri në tetor për të ofruar një zgjidhje për provimin juridik në shqip.
BDI e krahason këtë me reagimin e tij për aktgjykimin e Hagës për ish-udhëheqësit e UÇK-së: Shasivari si “kozmpolit” nuk kishte nevojë të priste — ai reagoi para se aktgjykimi të publikohej.
“Paradoksi i Shasivarit: për të drejtën konkrete të studentëve shqiptarë kërkon kohë, ndërsa për një aktgjykim ende të papublikuar nxitoi të mbante qëndrim”, thuhet në reagimin e BDI-së. Partia kujton se si profesor, Shasivari e kishte kritikuar ish-ministrin Filkov për moslejimin e provimit në shqip, por tani e relativizon atë; ndërsa për aktgjykimin e Hagës, kur shqiptarët protestonin shtatë ditë rresht, ai u justifikua duke thënë se qëndrimi i tij është në përputhje me “institucionet europiane”.
Reagimi mbyllet me thirrjen: “Dorëheqje, Jeton Shasivari”.
Burimi: Makfax
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.