BE-ja dhe Kanadaja shqyrtojnë eksportet afatgjata të gazit, mes krizës së furnizimit në Evropë

Bashkimi Evropian dhe Kanadaja planifikojnë të shqyrtojnë mundësinë e eksporteve afatgjata të gazit natyror të lëngshëm (LNG) drejt Evropës, në një përpjekje për të forcuar sigurinë energjetike të bllokut, i cili po përballet me rritjen e çmimeve të gazit dhe nivele historikisht të ulëta të rezervave në magazina.

Sipas një draft-deklarate të përbashkët, të parë nga Euronews, çështja pritet të diskutohet në samitin BE-Kanada, që do të mbahet në Montreal më 29 dhe 30 tetor. Palët synojnë të kryejnë një studim fizibiliteti për eksportet e LNG-së, si dhe të thellojnë bashkëpunimin në rrjetet elektrike, ruajtjen e energjisë përmes baterive dhe mbrojtjen fizike e kibernetike të infrastrukturës energjetike.

Në dokument theksohet se të dyja palët do të vlerësojnë mundësitë për lidhje afatgjata energjetike, investime dhe marrëveshje furnizimi, me synimin për të rritur sigurinë energjetike të Evropës dhe për të nxitur zhvillimin ekonomik të Kanadasë, duke respektuar njëkohësisht objektivat e përbashkëta klimatike.

Nisma vjen në një kohë kur BE-ja po përpiqet të diversifikojë burimet e furnizimit me energji dhe të ulë varësinë nga furnizuesit e ekspozuar ndaj tensioneve gjeopolitike. Pas pushtimit rus të Ukrainës në shkallë të plotë, Shtetet e Bashkuara janë kthyer në furnizuesin më të madh të LNG-së për Bashkimin Evropian, duke zëvendësuar një pjesë të konsiderueshme të importeve të mëparshme të gazit rus.

Ndërkohë, ndërprerjet në prodhimin dhe transportin e gazit nga Katari kanë shtuar shqetësimet për sigurinë e furnizimit me energji.

Megjithatë, ende nuk janë përcaktuar sasitë e gazit që Kanadaja mund të eksportojë drejt Evropës, kostot e furnizimit dhe infrastruktura e nevojshme për transportimin e tij në tregjet evropiane.

Kryeministri kanadez, Mark Carney, ka mbështetur planet për të dyfishuar kapacitetin e eksportit të LNG-së në bregdetin perëndimor të vendit. Ai ka shprehur gjithashtu gatishmëri për të shqyrtuar zhvillimin e eksporteve të gazit nga provinca e New Brunswick, nëse hiqen kufizimet për frakturimin hidraulik, i njohur si fracking, dhe krijohen kushtet për zhvillimin e industrisë vendase.

Plani synon ta pozicionojë Kanadanë si një furnizues alternativ të gazit për Evropën, në një periudhë kur siguria energjetike dhe diversifikimi i importeve mbeten ndër prioritetet e Bashkimit Evropian.