BE përshëndet zgjedhjet në Turqi: Shenjë e forcës demokratike
Ndonëse politika e tij është ajo e një qëndrimi rreptësisht neutral në lidhje me rezultatin e zgjedhjeve, si të shteteve anëtare, ashtu dhe vendeve të treta, Komisioni Europian e cilësoi si mjaft pozitive pjesëmarrjen e lartë në votimet e së dielës në Turqi.
Në një deklaratë të përbashkët me kryediplomaten europiane, Federica Mogherini, Komisioneri i Zgjerimit, Johannes Hahn, e cilësoi rezultatin e zgjedhjeve si shenjë të qartë të forcës së demokracisë turke.
Në mënyrë të veçantë, theksi vihet te fakti, që të gjitha partitë e rëndësishme do të kenë përfaqësim në Parlamentin e ri, çka interpretohet si një aludim për partinë prokurde HDP, që mundi të kapërcente pragun e lartë zgjedhor të 10%-shit, duke arritur kështu të hyjë për të parën herë në Asamblenë Kombëtare.
Zyrtarisht, përfaqësuesit e BE-së nuk mund të thonë më shumë se kaq. Por në të vërtetë, i gëzohen faktit që AKP-ja e Recep Tayyip Erdoganit e humbi shumicën absolute, mendon Amanda Paul, e “think tank”-ut “European Policy Centre”.
Prirjet autoritare të AKP-së dhe të Presidentit Erdogan nxisin shpresat, që përfundimi i zgjedhjeve do ta sjellë Turqinë në rrugën e demokracisë, thotë ajo. Eurodeputeti Alexander Graf Lambsdorff e komenton humbjen e shumicës absolute si refuzim të elektoratit ndaj fantazive të Erdoganit dhe, mbi të gjitha, islamizimit të jetës publike.
Kreu i shtetit turk e ka bërë të qartë më shumë se një herë, që BE-ja nuk i intereson shumë. Kritikave të Mogherinit dhe Hahnit për arrestimin e disa gazetarëve në muajin dhjetor, ai iu përgjigj me shpërfillje.
Turqisë, – tha Erdogan asokohe, – nuk i intereson se çfarë thotë BE, e as nëse blloku ka ndërmend ta pranojë apo jo në radhët e tij. Turqia është që prej 1999-s kandidate për anëtarësim, por bisedimet kanë ngecur që prej vitit 2005. Bllokimi i tyre, sidoqoftë, nuk është vetëm pasojë e situatës në vend, por edhe e rezistencës së fortë, që i bëhet afrimit të Ankarasë në BE nga Gjermania dhe Franca.
