Beteja për Tiranën, KQZ nis rinumërimi i 70 kutive të kontestuara

Komisioni Qendori i Zgjedhjeve numëron sot kutitë e votimit të ankimuara nga Partia Socialiste dhe Partia për Drejtësi Integrim dhe Unitet. Janë 70 kuti të qarkut Tiranë të kontestuara zyrtarisht një ditë më parë nga këto dy subjekte politike.

Fillimisht ishte PDIU që ankimoi rezultatin, pas pretendimeve se janë vjedhur vota aq sa kanë përcaktuar një mandat deputeti për qarkun e Tiranës. Sipas PDIU-së, ka prova të mjaftueshme që vërtetojnë vjedhjen e votave dhe tjetërsimin e rezultatit.

Pak ditë më parë u publikuan edhe disa materiale filmike, të cilat sipas PDIU-së vërtetojnë manipulimin me votat. Kjo parti nuk e kaloi pragun e 3 përqindëshit për të marrë një mandat deputeti, ndërsa rezultati u diskutua vetëm për 37 vota.