BIA arreston dy gra për spiunazh: dyshohen se i dërgonin të dhëna konfidenciale shërbimit informativ të Shqipërisë dhe strukturave të inteligjencës në Kosovë

Agjencia serbe e Sigurisë dhe Informacionit (BIA), në një operacion të gjerë e të sinkronizuar me Prokurorinë e Lartë Publike në Jagodinë dhe drejtoritë e policisë në Vranjë dhe Jagodinë, ka arrestuar sot dy gra të dyshuara për spiunazh, siç njofton Nova.rs.

Sipas raportimit të Nova.rs, në Vranjë u arrestua D. C. (46) nga Shillova e komunës së Gjilanit, ndërsa në territorin e Jagodinës u arrestua N. P. (50). Emrat e plotë të të dyshuarave nuk janë bërë publikë.

Ato akuzohen për veprën penale të spiunazhit sipas nenit 315 të Kodit Penal të Serbisë (paragrafët 1 dhe 3). Dyshohet se ato vazhdimisht mblidhnin dhe i dorëzonin të dhëna konfidenciale Shërbimit Informativ Shtetëror të Shqipërisë (SHISH), si dhe degëve të tij në Kosovë — të ashtuquajturës Agjencia Kosovare e Inteligjencës (AKI) dhe Njësisë së Inteligjencës së Policisë së Kosovës.

Sipas burimeve nga hetimi që citon Nova.rs, në qendër të interesimit të të dyshuarave ishin të dhënat për pjesëtarët aktivë të BIA-së dhe detajet e angazhimit të tyre në terren.

Me urdhër të gjykatës kompetente u kontrollua objekti në Jagodinë që përdorte e dyshuara N. P., ku u sekuestruan pajisje elektronike dhe sende të tjera për të cilat dyshohet se përdoreshin për komunikim dhe kryerjen e kësaj vepre penale.

Hetimi vazhdon dhe prokuroria kompetente po punon për zbardhjen e plotë të rrethanave të rastit.