BIA hedh poshtë akuzat për përgjimin e gazetarëve të Radar-it: pretendime dashakeqe për destabilizim

Agjencia e Informacionit të Sigurisë (BIA) e Serbisë hodhi poshtë sot pretendimet për përgjime, duke i cilësuar ato si “të sajuara me dashakeqësi, me qëllimin e vetëm të destabilizimit të mëtejshëm të gjendjes tashmë të trazuar të sigurisë” dhe të rrënimit të rendit të përcaktuar me Kushtetutë, siç njofton portali SNM.

Reagimi erdhi pasi javorja Radar njoftoi sot se ka arritur te dokumente që, sipas saj, konfirmojnë se BIA, nën drejtimin e drejtorit Vladimir Orlić, ka përgjuar dhe ka ndjekur kryeredaktoren e këtij mediumi, Vesna Mališićin, si dhe gazetarët Sandra Petrušić dhe Milan Radonjić. Sipas të dhënave që Radar-i kishte publikuar më herët, ekziston dyshimi se janë përgjuar edhe prokurorët e Prokurorisë për Krim të Organizuar, të cilët punuan në çështjen “Nadstrešnica”.

Në komunikatë, BIA thekson se “të gjithë ata që në veprimtarinë e tyre shkatërruese antishtetërore kryejnë vepra penale mund të llogarisin me siguri se do të jenë gjithmonë objekt i punës së BIA-s”, dhe se agjencia informacionet e saj zyrtare ua dorëzon vazhdimisht organeve kompetente, në përputhje me ligjin. Sipas agjencisë, punën e këtij shërbimi “në kohët më të vështira e kanë mbajtur njerëz të ndershëm”, të cilët veprimtarinë e kanë kryer me respektim të Kushtetutës dhe ligjeve të Serbisë.

“Pavarësisht të gjitha përpjekjeve të eksponentëve të shërbimeve të huaja dhe grupeve të presionit, BIA edhe në periudhën e ardhshme do të veprojë ekskluzivisht në mbrojtje të rendit të përcaktuar me Kushtetutë, të sigurisë së Republikës së Serbisë dhe vetëm të interesave të saj shtetërore, siç përcaktohet qartë në Ligjin për BIA-n dhe në ligjet e tjera që rregullojnë fushën e punës së BIA-s”, thuhet në komunikatën e agjencisë, siç njofton SNM.