Arrestohet komandanti i SAJ-së Igor Žmirić dhe tetë policë të tjerë për dyshimet e torturës në garazhin e Qeverisë së Serbisë

Komandanti i Njësisë Speciale Antiterroriste (SAJ) të Serbisë, Igor Žmirić, u arrestua sot në Beograd në një aksion të inspektorëve të Sektorit të Kontrollit të Brendshëm të Ministrisë së Punëve të Brendshme, i kryer me urdhër të Prokurorisë Themelore të Parë Publike në Beograd, siç njofton Danas. Sipas raportimit të Nova.rs, në të njëjtin aksion u arrestuan edhe ish-pjesëtarë dhe pjesëtarë aktualë të Njësisë për Sigurimin e Personave dhe Objekteve të Caktuar (JZO), ndërsa, siç njofton Danas, u ndalua edhe ndihmësi i Žmirićit, Goran Filipoviq.

Ministria e Punëve të Brendshme konfirmoi zyrtarisht se nëntë personave u është caktuar ndalimi deri në 48 orë. Mes të ndaluarve janë tetë policë të MPB-së së Serbisë, si dhe një person i nëntë, i cili në kohën e kryerjes së veprës ishte gjithashtu polic. Të gjithë dyshohen për veprën penale të keqtrajtimit dhe torturës, ndërsa të dyshuarit do të dërgohen para prokurorisë kompetente brenda afatit ligjor, njoftoi MPB-ja.

Sipas prokurorisë, vepra është kryer natën mes 14 dhe 15 gushtit të vitit 2025, rreth orës 22:30 deri në orën 01:00, në garazhin e ndërtesës së Qeverisë së Serbisë në rrugën Nemanjina në Beograd. Të dyshuarit, siç thuhet në njoftim, si bashkëkryerës dhe persona zyrtarë të JZO-së, me përdorimin e forcës dhe kërcënimeve u kanë shkaktuar dhimbje të madhe dhe vuajtje të rënda një numri më të madh personash të dëmtuar, me qëllim që prej tyre të merrnin informacione, t’i frikësonin dhe t’i ndëshkonin paligjshmërisht.

Arrestimet lidhen me rastin e njohur si “Garazhi”, i cili nisi me kallëzimin penal kundër shefit të atëhershëm të JZO-së, Marko Kričak, dhe bashkëpunëtorëve të tij, të akuzuar se gjatë verës së vitit 2025 mbajtën paligjshmërisht një grup demonstruesish në garazhin e ndërtesës së Qeverisë. Danas, duke u thirrur në burime nga MPB-ja, njofton se Žmirići dhe Filipoviqi dyshohen se në atë kohë, sa ishin pjesëtarë të JZO-së, keqtrajtuan studenten Nikolina Sinđelić dhe kolegët e saj.