Bie besimi në ekonomi, qytetarët ulin shpenzimet, pasiguri në disa sektorë

Besimi në ekonomi ka rënë në muajin prill. Sipas vrojtimit më të fundit të Bankës së Shqipërisë, treguesi i ndjesisë ekonomike ra me 1.5 pikë, duke

Besimi në ekonomi ka rënë në muajin prill. Sipas vrojtimit më të fundit të Bankës së Shqipërisë, treguesi i ndjesisë ekonomike ra me 1.5 pikë, duke shënuar kthesë pas optimizmit disa-mujor.

Konsumatorët, dhe sektorë si shërbimet e tregtia ndikuan në uljen e pikëzimit në sondazhin mujor, ndërsa niveli mbetet 6.4 pikë mbi mesataren, çka tregon se klima ekonomike vijon të jetë relativisht e qëndrueshme.

Për sektorë si industria dhe ndërtimi qasja është pozitive në prill, duke kompensuar pjesërisht rënien në sektorët e tjerë. Besimi në industri u rrit me 1.5 pikë përqindje, i nxitur nga pritje më optimiste për prodhimin dhe kontratat nga eksportet. Ndërkohë, ndërtimi shënoi rritjen më të fortë mujore, me +4.9 pikë përqindje, i mbështetur nga përmirësimi i porosive aktuale.

Nga ana tjetër, shërbimet dhe tregtia, dy sektorë kyç për ekonominë e brendshme – kanë dhënë sinjale dobësimi, si pasojë e vlerësimeve më të dobëta për kërkesën dhe aktivitetin aktual dhe performanca e dobët e shitjeve.

Sinjali më shqetësues vjen nga konsumatori. Treguesi i besimit konsumator ra me 3.2 pikë përqindje. Rënia është e ndikuar nga pritjet për financat personale, situatën ekonomike dhe sidomos blerjet e mëdha. Të dhënat në tabelat e vrojtimit tregojnë se konsumatorët janë më pesimistë edhe për të ardhmen, ndërsa pritjet për çmimet dhe papunësinë kanë pësuar përkeqësim në prill.