Bilanci i aksidenteve nga bora

Reshjet e fundit të borës në Kosovë kanë vështirësuar qarkullimin e automjeteve dhe kanë shkaktuar një numër aksidentesh. Numri i përgjithshëm i aksidenteve nga nata e së dielës është 109, 90 prej të cilave kanë kaluar pa lëndime, ndërsa në 19 aksidente të tjera ka pasur persona të lënduar.

Kjo sipas zyrtarit për informim në Policinë e Kosovës, Daut Hoxha, i cili tha se vështirësi në qarkullim ka pasur edhe në rrugët e kryeqytetit, ku në katër aksidente të ndara janë përfshirë rreth 30 makina.

Në “Rrugën e Bledit” në Prishtinë kanë ndodhur aksidente me 8 makina të përfshira. Ndërsa në rrugët “Eqrem Çabej”, “Isa Kastrati” dhe “Gazmend Zajmi”, tri aksidente me 15 makina të përfshira. Ndërsa Policia e Kosovës, pas vlerësimit të gjendjes në terren, ka marrë masa duke bllokuar përkohësisht këto rrugë në mënyrë që të shmangen aksidentet që mund të ndodhin si rezultat i borës dhe ngricave, ka thënë Hoxha.

Policia e Kosovës ka bërë thirrje që drejtuesit e makinave t’i respektojnë rregullat e komunikacionit që dalin nga Ligji mbi komunikacionin rrugor dhe ti kenë pajisjet e dimrit me vete.