Bjellorusia dhe Rusia zhvillojnë stërvitje mbi përdorimin luftarak të armëve bërthamore

Ministria e Mbrojtjes e Bjellorusisë njoftoi të hënën fillimin e stërvitjeve ushtarake mbi përdorimin luftarak të armëve bërthamore dhe mbështetjen bërthamore në bashkëpunim me Rusinë.

Në një deklaratë, ministria tha se ushtrimet kanë për qëllim rritjen e gatishmërisë së forcave të armatosura bjelloruse për të përdorur “armë moderne”.

“Qëllimi i trajnimit është përmirësimi i trajnimit të personelit, testimi i gatishmërisë së armëve, pajisjeve ushtarake dhe speciale për të kryer misione dhe organizimi i vendosjes luftarake nga zona të paplanifikuara”, thuhet në deklaratë.

Ministria shtoi se stërvitjet, të zhvilluara së bashku me Rusinë, do të përfshijnë praktikimin e dorëzimit të municioneve bërthamore dhe përgatitjen e tyre për përdorim.

Thuhet se ushtrimet do të përqendrohen në testimin e gatishmërisë për vendosje luftarake nga vende të papërgatitura në të gjithë Bjellorusinë, me theks në fshehjen, lëvizjen në distanca të gjata dhe koordinimin operacional të forcave dhe pajisjeve.

“Stërvitja është një ngjarje e planifikuar stërvitore brenda Shtetit të Unionit (aleancës midis Rusisë dhe Bjellorusisë), nuk është e drejtuar kundër vendeve të treta dhe nuk përbën kërcënim për sigurinë në rajon”, tha ajo.