Blloku nuk lëshon pe për kryeparlamentarin

Blloku LDK- AAK- Nisma dhe VV nuk e ka ndërmend që të lëviz nga qëndrimet e tyre.

Pavarësisht vendimit të Gjykatës Kushtetuese që posti i kryetarit të Kuvendit i takon PDK-së, si grupi më i madh parlamentar dhe pavarësisht thirrjeve të një pjese të analistëve politik që Blloku duhet të lëshojë pe për kryekuvendarin, përfaqësues të LVAN-it thonë se nuk do të tërhiqen.

Sekretari i përgjithshëm i AAK-së, Burim Ramadani i ka thënë Gazetës Blic se Blloku nuk e ka ndërmend që të tërhiqet.

“Nuk është çështje e pozitave, por e konceptit dhe ndryshimit që duhet të ndodh në Kosovë”, ka thënë Ramadani.

Sipas tij, ndryshimi duhet të jetë i plotë e jo i pjesshëm.

“Shumica parlamentare është e vendosur për ndryshim. Ndryshimi duhet të jetë i plotë dhe jo i pjesshëm. Pres që PDK të reflektojë dhe të hap rrugë për interesin e Kosovës”, ka thënë Ramadani.

Analistët politik në vazhdimësi po i kërkojnë Bllokut që të heq dorë nga posti i kryetarit të Kuvendit, në mënyrë që pastaj t’i hapet rrugë krijimit të institucioneve tjera, si forma më e mirë për tejkalimin e krizës politike.