Bombarduesit amerikanë B-52 mbërrijnë në Lindjen e Mesme mes tensioneve në rritje me Iranin

Ushtria amerikane ka njoftuar se bombarduesit e saj B-52 kanë mbërritur në Lindjen e Mesme, pa bërë të ditur saktësisht se ku janë dislokuar, siç njofton Al Jazeera. Sipas deklaratës së Forcave Ajrore të SHBA-së, bombarduesit e dislokuar si pjesë e një task force bombarduesish janë gati për të kryer “operacione dinamike të përdorimit të forcës, frenim dhe operacione mbrojtëse në gjithë rajonin”.

B-52 është një bombardues strategjik me rreze të gjatë veprimi, i aftë të lëshojë raketa nga distanca të mëdha dhe të mbajë dhjetëra bomba dhe raketa lundruese. Dislokimi i tij lexohet si një sinjal i qartë force në një moment kur prania ushtarake amerikane në rajon po rritet prej javësh.

Mbërritja e bombarduesve vjen ndërsa tensionet me Iranin vazhdojnë të rriten: Uashingtoni dhe Teherani ende nuk kanë rënë dakord as për vendin e mbajtjes së bisedimeve, ndërsa ndërmjetësit e Katarit po përpiqen t’i mbajnë të dyja palët në tryezën diplomatike përpara se situata të rrëshqasë drejt një përballjeje të re.

Paralelisht, në rajon vazhdojnë incidentet detare rreth Ngushticës së Hormuzit, rruga strategjike përmes së cilës kalon një e pesta e naftës dhe gazit të lëngshëm që tregtohet në botë në kohë paqeje.