SHBA zgjeron bllokadën ndaj Iranit: CENTCOM krijon Task Force Iron Gate për të kufizuar tregtinë tokësore

Pas muajsh bllokade detare ndaj Iranit, ushtria amerikane po krijon një task force të re për të forcuar përpjekjet e Uashingtonit për ta kufizuar lëvizjen e sistemeve të avancuara të armëve dhe materialeve të tjera të sanksionuara përmes kufijve tokësorë të Teheranit dhe Detit Kaspik, siç njofton Reuters. Shpallja e task forcës, e cila nuk ishte raportuar më parë, pritet të bëhet më vonë të shtunën nga Komanda Qendrore e SHBA-së (CENTCOM), sipas një deklarate që Reuters e pa përpara publikimit.

Task Force Iron Gate, siç do të quhet, do të ketë bazën në Tampa të Floridës dhe do të koordinohet me agjenci të tjera të qeverisë amerikane. Përtej lëvizjes së armëve, ajo do të përqendrohet edhe te mallrat me përdorim të dyfishtë dhe te rrjedhat e paligjshme të të ardhurave të Iranit.

“Forcimi i bashkëpunimit të CENTCOM-it me partnerët ndërinstitucionalë të SHBA-së do ta kufizojë edhe më shumë aftësinë e Iranit për të financuar terrorizmin, për të rindërtuar fabrikat e armëve dhe për të ripërtërirë ushtrinë e tij”, tha në deklaratë komandanti i Komandës Qendrore, admirali Brad Cooper.

Sipas vlerësimit të CENTCOM-it, bllokada detare e deritanishme e ka penguar Iranin të eksportojë naftë bruto me vlerë mbi 25 miliardë dollarë. Task force e re e zgjeron kështu presionin amerikan nga deti në rrugët tokësore dhe në Detin Kaspik, në një kohë kur ndërmjetësimi i Katarit për një marrëveshje paqeje mes Uashingtonit dhe Teheranit vazhdon pa një përparim vendimtar.