Bombat ruse godasin zonën rezidenciale të Kharkivit: pesë të vrarë dhe 53 të plagosur

Sulmet ajrore ruse goditën të hënën një zonë rezidenciale në Kharkiv, qytetin e dytë më të madh të Ukrainës, duke vrarë të paktën pesë persona dhe duke plagosur 53 të tjerë, siç njofton Reuters.

Guvernatori rajonal Oleh Syniehubov njoftoi në Telegram se tri bomba goditën zona të ndryshme të qytetit. Sipas tij, 30 nga të plagosurit po marrin ndihmë mjekësore në spitale, tre prej tyre në gjendje të rëndë, ndërsa mes të plagosurve janë edhe tre fëmijë.

Kryebashkiaku Ihor Terehov tha se ekipet e shpëtimit nxorrën dy trupa nga rrënojat. Fasada dhe ballkonet e ndërtesave të banimit u dëmtuan rëndë, apartamentet u shkatërruan nga brenda, ndërsa shpëtimtarët nxorrën banorë të tronditur mes grumbujve të rrënojave; edhe magazinat përreth pësuan dëme.

Banorja Viktoriia Nahornyak i tregoi televizionit Reuters, mes tingujve të sirenave të alarmit, se kishte parë dy fqinjë të plagosur të mbuluar me gjak: “Vajza ime doli jashtë, dhe macja jonë iku… mora vetëm dokumentet dhe dola jashtë me rrobat që kam veshur”. Ndër viktimat, një banor u gjet i vdekur në shtratin e tij, ndërsa një trup tjetër shtrihej në tokë, i mbuluar me batanije.

Kharkivi, rreth 30 kilometra larg kufirit rus, mbetet nën sulme të vazhdueshme të Rusisë që nga fillimi i pushtimit në shkurt të vitit 2022, sipas Reuters.