Bordi i RTS-së shtyn vendimin për drejtorin në detyrë dhe i drejtohet REM-it për qëndrim të qartë

Bordi Drejtues i Radio-Televizionit të Serbisë (RTS) e ka shtyrë për seancën e ardhshme diskutimin për zgjedhjen e drejtorit të përgjithshëm në detyrë të shërbimit publik, njoftoi Shoqata e Gazetarëve të Serbisë (UNS).

Sipas informacioneve që disponon UNS-i, Bordi Drejtues iu drejtua Këshillit të Trupit Rregullator për Media Elektronike (REM) me kërkesë për një bisedë dhe për “formulimin e një qëndrimi të qartë mbi çështjet e ndërlikuara me interes për shërbimin publik në rrethanat e krijuara rishtazi”. Portali i gazetës Danas kishte njoftuar më herët se seanca e sotme, e parashikuar për në mesditë, ishte shtyrë për në orën 16:00.

Kryetari i Këshillit të REM-it, Stevica Smederevac, deklaroi dje për UNS-in se shumicës së anëtarëve të Bordit Drejtues u ka skaduar mandati dhe se, për këtë arsye, ai organ nuk ka bazë ligjore për të emëruar drejtorin në detyrë, pavarësisht mendimit të mëparshëm të Ministrisë së Informimit dhe Telekomunikacionit.

Pesë anëtarëve të Bordit — Branislav Klanšček, Miroslav M. Nikolić, Branko Radun, Milivoj Pavlović dhe Ljiljana Đurđevac — mandati pesëvjeçar u skadoi më 13 korrik, ndërsa anëtarit Šćepan Praščević mandati i kishte skaduar në dhjetor të vitit të kaluar. Për pasojë, që nga 14 korriku Bordi Drejtues i RTS-së ka vetëm tre nga nëntë anëtarë me mandat të vlefshëm, ndërsa çështja e drejtorit në detyrë u hap pas dorëheqjes së drejtoreshës së përgjithshme Manja Grçiç.