Franca dhe Mali i Zi forcojnë bashkëpunimin, përparësi ndërtimi i Qendrës Klinike Universitare në Podgoricë

Ministrja e Punëve Publike e Malit të Zi, Majda Adžović, u takua me ministrin e deleguar pranë Ministrisë për Evropë dhe Punë të Jashtme të Republikës së Francës, të ngarkuar për tregtinë e jashtme dhe atraktivitetin, Nicolas Forissier, me të cilin bisedoi për realizimin e mëtejshëm të marrëveshjes ndërqeveritare mes Malit të Zi dhe Francës, si dhe për përmirësimin e bashkëpunimit në fushën e zhvillimit infrastrukturor, siç njofton CdM.

Në fokus të takimit, sipas raportimit të CdM-së, ishte konkretizimi i projekteve të përfshira në marrëveshjen ndërqeveritare, me theks të veçantë te ndërtimi i Qendrës Klinike Universitare në Podgoricë, i cili paraqet një nga projektet më të rëndësishme të dy vendeve. Bashkëbiseduesit shqyrtuan përparimin e deritanishëm dhe hapat e ardhshëm, me qëllim krijimin e kushteve për realizimin e suksesshëm të projektit.

Adžović theksoi se është me rëndësi të veçantë që, përmes zbatimit efikas të marrëveshjes ndërqeveritare, të sigurohet realizimi i projekteve konkrete që do të kontribuojnë në modernizimin e infrastrukturës dhe në cilësinë e jetës së qytetarëve.

Në takim u konfirmua përkushtimi i ndërsjellë për forcimin e mëtejshëm të partneritetit dhe intensifikimin e bashkëpunimit mes Malit të Zi dhe Francës. Siç njofton CdM, gjatë vizitës Forissier u takua edhe me ministrin e Financave, Novica Vukoviq, ku u bisedua për investimet e mëdha, me mesazhin se Franca është e gatshme të ndihmojë zhvillimin e Malit të Zi.