BOTËRORI 2026 – UEFA: FIFA kaloi vijën e kuqe me rastin e Balogun

LOZANË, 6 korrik /ATSH-AFP/ – FIFA kaloi vijën e kuqe duke pezulluar kartonin e kuq të dhënë amerikanit Falorin Balogun gjatë Kupës së Botës 2026, tha sot UEFA duke denoncuar një vendim që ishte “i pashembullt, i pakuptueshëm dhe i pajustifikueshëm”.

“Futbolli, si çdo sport tjetër, bazohet në rregulla, të cilat janë themeli i konkurrencës së drejtë, të ndershme dhe transparente. Ndonjëherë, rregullat janë të hapura për interpretim. Në këtë rast, ky nuk është rasti”, vazhdoi organi drejtues evropian në një deklaratë me ashpërsi të pazakontë.

UEFA as nuk e përmendi telefonatën e bërë nga presidenti i SHBA-së Donald Trump me presidentin e FIFA-s, Gianni Infantino.

“Një pezullim automatik minimal prej një ndeshjeje pas një kartoni të kuq nuk është një opsion i lënë në diskrecionin e organeve drejtuese dhe nuk kërkon një vendim nga një organ kompetent për t’u zbatuar”, theksoi organizata evropiane.

Gjatë ndeshjes së raundit të 1/32 kundër Bosnjës dhe Hercegovinës, Falorin Balogun u përjashtua nga loja për shkak se shkeli në këmbën e mbrojtësit boshnjak Tarik Muharemoviç ndërsa ai po binte nga një kërcim.

Të premten, ai u tha gazetarëve se kartoni i kuq ishte diçka që ai “thjesht duhej ta pranonte”.

Për UEFA-n, pezullimi i tij minimal për ndeshjen e raundit të 1/16 kundër Belgjikës është “një parim i sanksionuar në rregullore, i cili nuk mund të pranojë asnjë përjashtim, veçanërisht në mes të një turneu gjatë të cilit disa lojtarë të tjerë kanë përjetuar të njëjtën situatë”.

“Kur siguria ligjore e rregullave nuk garantohet më nga ata që janë kujdestarët e tyre, integriteti i lojës është në rrezik dhe besueshmëria e një gare minohet. Në mënyrë të ngjashme, një vendim i tillë krijon një precedent në turneun aktual, ku situata të ngjashme tani do të duhet të marrin trajtim identik, në dëm të garës”, shton organi evropian i futbollit./ a.jor.