Brnabiç: SNS-ja do të jetë opozitë e ashpër në Kuvend, askush nuk do të tërhiqet

Nënkryetarja e Këshillit Kryesor të Partisë Përparimtare Serbe (SNS), Ana Brnabiç, ka deklaruar se partia e saj, pas humbjes në zgjedhjet e parakohshme parlamentare ku fitoi Lista Studentore, do të jetë opozitë e ashpër në Kuvendin Popullor dhe se Serbinë do ta ketë në vend të parë, por do të luftojë për qëllimet e saj me mjete demokratike, siç njofton portali Mondo, duke iu referuar agjencisë Tačno.

“Askush nuk do të tërhiqet. Por, nga ana tjetër, askush nuk do të bëjë atë që bënin ata. Ne do të tregojmë se Serbia është në vendin e parë për ne dhe do të luftojmë me mjete demokratike, jo kështu si ata”, tha Brnabiçi për TV Informer, sipas raportimit të Mondos. Ajo shtoi se SNS-ja do të mbetet partia që e ruan Serbinë dhe punon në interesin e saj.

“Mezi pres të ulem në bankat e deputetëve, do të jetë grupi parlamentar më i fortë. Lufta vazhdon dhe duhet të jesh aty edhe kur është rëndë, jo vetëm kur është lehtë”, theksoi ajo, siç transmeton Mondo.

E pyetur se cili do të jetë hapi i parë i pushtetit të ri, Brnabiçi vlerësoi se do të jetë vendosja e sanksioneve ndaj Rusisë. “Ata do të jenë një qeveri që do të marrë urdhra drejtpërdrejt. Pra, nuk kanë nevojë të pyesin shumë se çfarë do të bëjnë. Këta nuk investuan kot”, tha ajo.

Sa i përket mediave, Brnabiçi theksoi se gjatë 14 vjetëve të pushtetit të Aleksandar Vuçiçit asnjë redaktor nuk është paditur dhe asnjë televizion nuk është ndëshkuar apo ndaluar. “Vuçiçi praktikisht krijoi kushtet që të hapej N1, si degë e CNN-it në Serbi, ndërsa ata që në ditën e parë paralajmërojnë ndalimin e një televizioni të tërë”, tha ajo. Brnabiçi shtoi gjithashtu se, sipas saj, urimet e para për Ilija Srdanoviçin, të parin e Listës Studentore, mbërritën nga Radoje Zviceri dhe kryeministri i Kroacisë, Andrej Plenkoviç, dhe përfundoi: “Do ta shihni në ditët, javët dhe muajt e ardhshëm se gjithçka që thamë ne ishte e vërtetë, ndërsa gjithçka që thanë ata ishte gënjeshtër.”