Bukuria alpine e Valbonës, edhe këtë vit investimet rritën numrin e vizitorëve
Kryeministri Edi Rama solli sot në vëmendje bukurinë alpine të Valbonës, ku numri i vizitorëve, falë investimeve njeh rritje vit pas viti.
“Mirëmëngjes dhe dhe me bukurinë alpine të Valbonës, ku programi i Rilindjes Urbane, investimet e Fondit Shqiptar të Zhvillimit dhe nxitja e sipërmarrjes turistike e kanë rritur edhe këtë vit numrin e vizitorëve, ju uroj një të dielë të qetë”, u shpreh Rama, duke publikuar pamjet e mrekullueshme nga zona.
Parku Kombëtar i Valbonës është një kompleksitet bukurish interesante, ashtu siç janë vetë Alpet shqiptare.
Lugina e Valbonës është shpallur Park Kombëtar në janar të 1996-ës. Ky park ka një sipërfaqe prej 8000 hektarësh. Konsiderohet si mrekullia e Alpeve. Ndodhet 25-30 km në veriperëndim të qytetit të Bajram Currit, qendra e rrethit të Tropojës.
Kufizohet me Parkun Kombëtar të Thethit dhe zonën natyrore të mbrojtur ”Lumi i Gashit”. Territori i tij përshkohet nga rruga automobilistike Bajram Curri-Dragobi-Valbonë e Çerem.
Ka maja të larta e të thepisura dhe për çdo stinë ndërron koloritin e ngjyrave dhe duke paraqitur një dinamikë të jashtëzakonshme imazhesh në kushtet e një lugine plot të papritura e me shumë labirinte.
