Chiellini: Humbja ndaj Fiorentinës, padyshim sinjal shumë negativ

Giorgio Chiellini, aktualisht drejtor futbolli dhe strategjie te Juventusi, ndërhyri përmes lidhjes online në prezantimin e Memorialit të 24-t “Niccolò Galli”, që po zhvillohet në Firence. “Më vjen keq që nuk jam aty me ju. Shoh shumë miq në sallë dhe shpresoj të vij vitin tjetër personalisht”, – tha ai.

Duke folur për lidhjen me Fondacionin Galli, Chiellini kujtoi: “Pata fatin ta njihja Niccolò Galli, ishte vetëm një vit më i madh se unë. Fatkeqësisht nuk luajtëm kurrë bashkë, por e kam ndjekur nga afër atë rrugëtim. E falënderoj shumë për çmimin e karrierës, shpresoj të lë pas vlerat që kam përfaqësuar”.

Më pas u ndal tek eksperienca me Fiorentina: “Personalisht kam qenë shumë mirë, edhe pse ishte një sezon i vështirë në aspektin sportiv. Për fat arritëm të shpëtonim. Ishte hera e parë që largohesha nga shtëpia dhe kam ende shumë miq aty”. Për klubin vjollcë shtoi: “Kam pasur fatin të punoj me Fabio Paratici. Besoj se klubi është në duar të sigurta për të tashmen dhe të ardhmen”.

Ndërsa për momentin e Juventusit deklaroi: “Humbja ndaj Fiorentinës ishte padyshim një ditë negative. Po jetojmë ditë pas dite dhe tani presim ta mbyllim këtë kampionat”.