CNN, MS NOW dhe Politico në gjyq sot: gjykatësi vendos nëse do të mbrojë aksesin e tyre në Shtëpinë e Bardhë

Avokatët e presidentit Donald Trump dhe të tre mediave amerikane CNN, MS NOW dhe Politico dalin sot, më 8 tetor, para gjykatësit federal Timothy Kelly, i cili do të vendosë nëse do ta zgjasë mbrojtjen gjyqësore për aksesin e tyre në Shtëpinë e Bardhë gjatë javëve të ardhshme.

Trump njoftoi më 18 shtator se po i ndalonte CNN, MS NOW dhe Politico nga kompleksi i Shtëpisë së Bardhë, të cilat i cilësoi “fake news”. Brenda pak ditësh, mediat ngritën padi në gjykatën federale, duke argumentuar se masa shkel të drejtat kushtetuese për lirinë e fjalës dhe procesin e rregullt ligjor.

Më 24 shtator, gjykatësi Kelly — i emëruar në detyrë nga vetë Trump — lëshoi një urdhër të përkohshëm 14-ditor që e detyroi administratën t’ua rikthente gazetarëve lejet e shtypit. Seanca e sotme përqendrohet në kërkesën e mediave për një urdhër afatgjatë, që do ta mbronte aksesin e tyre derisa gjykata të japë vendimin përfundimtar, siç njofton USA Today.

Administrata Trump argumenton se aksesi në Shtëpinë e Bardhë është privilegj dhe jo e drejtë, dhe se mbulimi i mediave ka zbuluar informacione të klasifikuara, duke paraqitur rrezik për sigurinë kombëtare. Në vendimin e tij të mëparshëm, megjithatë, gjykatësi Kelly shkroi se provat sugjeronin që motivimi i vërtetë i masës nuk ishte shqetësimi për sigurinë kombëtare.

Që kur Shtëpia e Bardhë u detyrua t’i ripranonte mediat, Trump ka ndaluar CNN-në dhe Politico-n nga udhëtimet me Air Force One, duke e mbajtur të gjallë tensionin mes presidencës dhe shtypit në një nga betejat më të ndjeshme të mandatit të tij të dytë.