Greqia propozon taksë 10% mbi fitimet nga kriptomonedhat

ATHINË – Greqia ka propozuar vendosjen e një takse prej 10% mbi fitimet nga kriptomonedhat, në kuadër të një projektligji të ri që synon të rregullojë taksimin e aseteve digjitale, siç njofton Reuters.

Sipas projektligjit, fitimet kapitale nga kriptomonedhat do të taksohen me 10%, ndërsa fitimet deri në 500 euro në vit do të përjashtohen nga taksimi. Aktualisht, Greqia nuk ka një kuadër të plotë ligjor për taksimin e kriptomonedhave, dhe nisma e re synon të mbushë këtë boshllëk, duke rritur të ardhurat buxhetore dhe duke luftuar evazionin fiskal.

Dokumenti është hedhur në konsultim publik, i cili do të zgjasë deri më 22 tetor. Pas përfundimit të konsultimit, qeveria pritet ta dërgojë projektligjin për miratim në parlament.

Taksimi i kriptomonedhave ndryshon ndjeshëm nga një vend evropian në tjetrin, me norma që luhaten përgjithësisht nga 8% deri në 30%. Me propozimin e ri, Greqia synon të afrohet me praktikat e vendeve të tjera të Bashkimit Evropian, duke ofruar qartësi ligjore për investitorët.

Zyrtarët grekë pranojnë se është shumë e vështirë të vlerësohet madhësia e tregut të kriptomonedhave në vend, por theksojnë se rregullimi i ri do të ndihmojë në formalizimin e sektorit dhe në mbrojtjen e investitorëve.