Costa i telefonon Srdanoviçit: Vendi i Serbisë është në BE, prioritet konstituimi i parlamentit dhe formimi i qeverisë pa vonesë

Presidenti i Këshillit Evropian, Antonio Costa, i ka telefonuar sonte bartësit të Listës Studentore, Ilija Srdanoviç, dhe e ka uruar për fitoren në zgjedhjet e parakohshme parlamentare të mbajtura të dielën në Serbi, siç njofton portali ETV.

“Sapo pata një bisedë të mirë telefonike me Ilija Srdanoviçin. E urova për fitoren zgjedhore të Listës Studentore”, ka shkruar Costa në platformën X, sipas raportimit të ETV-së.

Costa ka theksuar se tani prioritet është që parlamenti të konstituohet pa vonesë dhe të formohet qeveria e re, me një tranzicion paqësor të pushtetit dhe me respektim të plotë të rezultateve zgjedhore.

“Vendi i Serbisë është në Bashkimin Evropian. Jemi gati ta mbështesim rrugën e saj evropiane, me fokus të qartë te reformat që populli serb ka kërkuar: sundimin e ligjit, luftën kundër korrupsionit dhe lirinë e medias”, ka shtuar presidenti i Këshillit Evropian.

Sipas rezultateve preliminare të Komisionit Republikan të Zgjedhjeve, Lista Studentore ka fituar 52,71 për qind të votave dhe 140 mandate në Kuvendin me 250 vende, ndërsa koalicioni i Aleksandar Vuçiçit ka marrë 104 mandate.