Dalë nga ndërprerja e fundit e energjisë, Kuba thotë se është e gatshme për çdo sulm të mundshëm nga SHBA.

Qeveria kubane ka deklaruar se është e përgatitur për çdo sulm të mundshëm nga Shtetet e Bashkuara, ndërsa vendi ishullor po përpiqet të rimëkëmbet nga një tjetër ndërprerje e energjisë elektrike, në kushtet e një bllokade të ashpër të naftës të vendosur nga Uashingtoni, e cila e ka çuar ekonominë në prag kolapsi.

Zëvendësministri i Jashtëm, Carlos Fernandez de Cossio, reagoi të dielën ndaj kërcënimeve të Presidentit amerikan Donald Trump gjatë kësaj jave për të marrë kontrollin e Kubës, duke theksuar se vendi “historikisht ka qenë i gatshëm të mobilizohet si komb përballë agresionit ushtarak”.

“Ne nuk besojmë se është diçka e mundshme, por do të ishim naivë nëse nuk përgatitemi,” tha de Cossio në një intervistë për NBC, në emisionin Meet the Press.

Deklaratat e tij u transmetuan një ditë pasi rrjeti kombëtar i energjisë elektrike në vend u shemb sërish, duke lënë miliona njerëz pa drita. Ndërprerja e së shtunës ishte e dyta brenda një jave dhe e treta gjatë muajit mars.

Sipas Unionit Shtetëror të Energjisë dhe Ministrisë së Energjisë dhe Minierave, rreth 72 mijë klientë në kryeqytetin Havana, përfshirë pesë spitale, rifituan energjinë elektrike në orët e para të së dielës. Megjithatë, kjo përbën vetëm një pjesë të vogël të popullsisë totale prej rreth dy milionë banorësh.

Autoritetet kubane thanë se ndërprerja totale e sistemit kombëtar u shkaktua nga një ndalim i papritur i një njësie prodhuese në centralin termoelektrik në Nuevitas, në provincën Camaguey, pa dhënë detaje të mëtejshme për shkakun e defektit.

Ndërkohë, Donald Trump, i cili ka bllokuar furnizimin me naftë drejt ishullit dhe ka kërcënuar eksportuesit e mundshëm me tarifa të larta, ka rritur presionin ndaj Kubës.

Sipas presidentit kuban Miguel Díaz-Canel, vendi nuk ka marrë furnizime me naftë nga jashtë për tre muaj, ndërsa prodhimi i brendshëm mbulon vetëm rreth 40% të nevojave energjetike.

Më 16 mars, Trump përshkallëzoi retorikën, duke deklaruar se udhëheqja kubane ishte në prag kolapsi dhe se ai priste të kishte “nderin” për të marrë kontrollin e vendit.

Nga ana e tij, de Cossio mohoi se struktura apo sistemi politik i Kubës ishte pjesë e negociatave në dialogun e fundit me SHBA-në, duke theksuar se ndryshimi i sistemit qeverisës është “absolutisht” jashtë diskutimeve.

Gjenerali amerikan Francis Donovan, drejtues i Komandës Jugore të SHBA-së, deklaroi në një seancë dëgjimore në Senat se ushtria amerikane nuk po përgatitet për një pushtim të Kubës. Megjithatë, ai shtoi se SHBA është e gatshme të mbrojë ambasadën e saj, bazën në Gjirin e Guantanamos dhe të përballet me çdo valë migrimi masiv nga ishulli, nëse do të jetë e nevojshme.

Ndërkohë, sipas raportimeve, qeveria kubane ka refuzuar një kërkesë të ambasadës amerikane në Havana për të importuar naftë për gjeneratorët e saj, si përgjigje ndaj bllokadës energjetike.