Darmanoviç-Memmedyarov: “Gazi natyror i Azerbajxhanit do të krijojë diversitet resursesh në Mal të Zi”

Ministri i Jashtëm i Malit të Zi: “Azerbajxhani është partneri ynë strategjik. Arritja e gazit të Azerbajxhanit në kufijtë tonë do të na ofrojë mundësi për diversitet resursesh dhe do t’i zhvillojë marrëdhëniet tona ekonomike”

Ministri i Jashtëm i Malit të Zi, Sërxhan Darmanoviç, tha se gazi natyror i Azerbajxhanit i cili do të transportohet përmes gazsjellësit Trans-Anatolian (TANAP) dhe atij Trans-Adriatik (TAP) do të krijojë mundësi për diversitet resursesh në Malin e Zi.

Në një konferencë të përbashkët për media pas takimit me Elmar Memmedyarov, homologun e tij nga Azerbajxhani, ku Darmanoviç gjendet për vizitë zyrtare, shefi i diplomacisë malazeze shprehu përgëzimet e tij për Linjën Hekurudhore Baku-Tbilis-Kars (BTK), e cila u hap më 30 tetor, duke e cilësuar atë si një projekt strategjik që lidh Lindjen dhe Perëndimin.

Duke folur për gazin e Azerbajxhanit i cili planifikohet të transportohet në Evropë përmes gazsjellësve TANAP dhe TAP, ai tha: “Azerbajxhani është partneri ynë strategjik. Arritja e gazit të Azerbajxhanit në kufijtë tonë do të na ofrojë mundësi për diversitet resursesh dhe do t’i zhvillojë marrëdhëniet tona ekonomike”.

Nga ana tjetër, Memmedyarov theksoi se është diskutuar në lidhje me çështje të energjisë. “Mali i Zi ka shprehur interesim për gazin natyror të Azerbajxhanit. Marrëdhëniet tona politike janë në nivel të mirë. Duhet t’i zhvillojmë edhe marrëdhëniet ekonomike”, tha Memmedyarov.

Në kuadër të vizitës së tij, ministri i Jashtëm i Malit të Zi është takuar edhe me presidentin e Azerbajxhanit, Ilham Aliyev.

Ndryshe, projekti TANAP synon të sjellë gazin natyror që prodhohet në fushën e gazit Shah Deniz-2 të Azerbajxhanit dhe zona të tjera të Detit Kaspik, kryesisht në Turqi, por edhe në Evropë, përmes Gazsjellësit Trans-Adriatik (TAP).