Dervishi ‘thumbon’ Berishën: Në këto tre javë është protestuar sa opozita në tre mandate!

Gazetari Lutfi Dervishi duke komentuar protestën qytetare, që këtë të enjte hyri në ditën e 19-të të saj, theksoi se në këto tre javë është protestuar sa për tre mandate nga ana e opozitës

Sipas Dervishit përpos mesazhit për qeverinë, protestuesit po i japin një mesazh edhe opozitës, partive të vjetra apo të reja, tek të cilat nuk ndihen të përfaqësuar.

I ftuar në emisionin “Off the Record” nga Andrea Danglli në A2CNN, Dervishi e cilësoi metaforikisht protestën si “banka e zemërimit”, ku çdokush ka hedhur monedhat e tij, duke krijuar një kapital që s’mund të shpërfillet.

“19 ditë protestë. Ky është një rekord në historinë e shtetit shqiptar. 19 ditë protestë e vazhdueshme, e pandërprerë, nuk ka ndodhur ndonjëherë. Masiviteti, përbërja, të rinjtë, energjia që kanë. E vetmja gjë që nuk sheh të protesta është lodhja. Madje ka një energji që shpaloset. Protesta është pasi mbyllin fjalimet dhe pasi largohen të gjitha kamerat. Është një lexim i gabuar nga opozita për 5 ditët e para, dhe lexim i gabuar nga qeveria për 15 ditët e para. Kjo është banka e zemërimit, ku çdo njëri ka hedhur monedhat e veta dhe është krijuar një kapital që s’mund të shpërfillet. Janë njerëz që s’e gjejnë veten të përfaqësuar. Ky grup të rinjsh thonë as me njërin as me tjetrin. Mesazhi është presioni për ndryshuar. Është një mesazh ndryshimi për të gjithë. Jo më kot është quajtur protesta më e bukur, pasi e ka nxjerrë Shqipërinë në dritë jashtëzakonisht mirë. Ka një imazh më të mirë të Shqipërisë në të gjitha nivelet”, tha Dervishi.

“Opozita është stigmatizuar, që nuk proteston, nuk bën, por shikoni çfarë ka ndodhur për tre javë, kanë protestuar sa për tre mandate të opozitës. Është një mesazh edhe për vet opozitën, gjithë këta njerëz të papërfaqësuar pse s’e kanë gjetur veten të përfaqësuar”, vijoi gazetari.