“Diskutime për disa fusha bashkëpunimi”- Hoxha takohet me Nënsekretaren Amerikane të Shtetit, Hooker: Shqipëri-SHBA ava

Ministri për Evropën dhe Punët e Jashtme, Ferit Hoxha, zhvilloi një takim me Nënsekretaren e Shtetit për Çështjet Politike të SHBA-së, Allison Hooker, në margjinat e Forumit Strategjik të “Bledit”.

Në një postim në platformën X, Hoxha e cilësoi takimin si një vazhdim të diskutimeve të zhvilluara në korrik në Uashington, duke theksuar rëndësinë e partneritetit strategjik mes Shqipërisë dhe Shteteve të Bashkuara.

“Ishte kënaqësi të takohesha me Nënsekretaren e Shtetit për Çështjet Politike, Allison Hooker. Riafirmuam rëndësinë e partneritetit strategjik Shqipëri-SHBA dhe angazhimin tonë të përbashkët për të thelluar më tej bashkëpunimin dypalësh në fushat me interes të ndërsjellë”, shkroi Hoxha.

Ai bëri të ditur se gjatë takimit u shkëmbyen mendime mbi bashkëpunimin në mbrojtje dhe siguri, si dhe mbi bashkëpunimin brenda NATO-s, veçanërisht pas Samitit të Aleancës në Ankara dhe përpara Samitit të ardhshëm që do të mbahet në Shqipëri.

“Diskutuam mjedisin e sigurisë dhe zhvillimet e fundit në Ballkanin Perëndimor, duke riafirmuar rëndësinë e angazhimit të vazhdueshëm në mbështetje të stabilitetit dhe sigurisë rajonale”, theksoi ministri.

Hoxha nënvizoi se Shqipëria dhe Shtetet e Bashkuara janë të bashkuara nga një partneritet i gjatë, i rrënjosur në vlerat demokratike, solidaritetin transatlantik dhe angazhimin e përbashkët për sigurinë.

“Ne mezi presim të vazhdojmë dialogun dhe bashkëpunimin tonë të ngushtë, me fokus në arritjen e rezultateve të prekshme që avancojnë interesat tona të përbashkëta dhe u sjellin dobi të dy vendeve tona”, përfundoi Hoxha.

Bled — It was a pleasure to meet with Under Secretary of State for Political Affairs @UnderSecStateP, Allison Hooker, on the margins of the Bled Strategic Forum.

Following up on our discussions in Washington, last July, we reaffirmed the importance of the Albania–U.S.… pic.twitter.com/lyCWqkTtu8

— Ferit Hoxha (@HoxhaFer) September 1, 2026