Droga e “Çimit”, Krimet e Rënda: 41 vjet burg kushërinjëve Demrozi

Prokuroria e Krimeve të Rënda kërkon dënimin në total me 41 vjet burgim për tre kushërinj, të akuzuar për “trafik ndërkombëtar lëndësh narkotike”, pasi në 19 gusht 2014 kanë tentuar të trafikojnë drejt Italisë sasinë prej 330 kg lëndë narkotike kanabis sativa, të ngarkuar në një kamion mallrash.

Muhamet Demrozi, Bashkim Demrozi dhe Agim Demrozi, në bashkëpunim me shtetasin Ermal Lusha, punësuan nje shofer kamioni duke i kërkuar këtij të fundit që të udhëtonte drejt Italisë për të marrë arka me verë në një kantinë në Breshia. Por gjatë kontrollit në kamion është gjetur lënda narkotike.

Në deklaratat e dhëna, shtetasi Muhamet Dermozi tregon se lëndën narkotike e kishte siguruar nga një shtetas me emrin “Çimi” dhe se ishte kujdesur vetë për të sistemuar kanabisin në kamion.

Rezultoi e provuar se shtetasi Muhamet Demrozi ka vepruar në bashkëpunim me kushërinjtë e tij, Bashkim dhe Agim, si edhe me shtetasin Ermal Lushi.

Në fillim të procesit, Gjykata për Krime të Rënda pranoi kërkesën e mbrojtjes për gjykim të shkurtuar për këta tre shtetas.