Droni rus godit Rumaninë si vend i NATO-s, reagon Ministria e Jashtme e Shqipërisë

Shqipëria ka reaguar pas sulmit me dron rus në qytetin Galați të Rumanisë, ku një pallat banimi u godit gjatë natës dhe mbetën të plagosur dy persona, mes tyre edhe një i mitur.

Përmes një reagimi zyrtar, Ministria për Evropën dhe Punët e Jashtme dënoi ashpër sulmin, duke e cilësuar atë si një përshkallëzim serioz dhe të papërgjegjshëm nga ana e Federatës Ruse.

“Shqipëria dënon sulmin rus me dron në Galați, Rumani, i cili goditi një ndërtesë banimi dhe plagosi civilë, përfshirë një të mitur. Shprehim solidaritetin tonë të plotë me popullin dhe autoritetet e Rumanisë dhe u urojmë shërim të shpejtë dhe të plotë të plagosurve”, thuhet në reagim.

Ministria thekson se incidenti nënvizon edhe njëherë koston njerëzore të luftës së Rusisë kundër Ukrainës dhe rrezikun që pasojat e saj paraqesin për sigurinë rajonale dhe civilët përtej kufijve ukrainas.

“Ky incident përfaqëson një përshkallëzim serioz dhe të papërgjegjshëm nga ana e Federatës Ruse dhe nënvizon më tej absurditetin dhe koston njerëzore të luftës së Rusisë kundër Ukrainës”, vijon reagimi.

Shqipëria ritheksoi se do të vazhdojë të qëndrojë në solidaritet të plotë me aleatët dhe partnerët ndërkombëtarë në mbështetje të përpjekjeve për rikthimin e paqes dhe respektimin e së drejtës ndërkombëtare.

Sulmi ndodhi gjatë natës mes 28 dhe 29 majit, kur Rusia rifilloi sulmet me dronë ndaj objektivave civile dhe infrastrukturës në Ukrainë, pranë kufirit me Rumaninë. Sipas Ministrisë rumune të Mbrojtjes, një prej dronëve hyri në hapësirën ajrore rumune dhe u përplas në çatinë e një pallati 10-katësh në qytetin Galați, duke shkaktuar zjarr.

Autoritetet rumune bënë me dije se dy persona mbetën të plagosur lehtë, ndërsa Ministria e Jashtme e Rumanisë e dënoi incidentin si një “përshkallëzim të rëndë dhe të papërgjegjshëm”.

Ndërkohë, NATO deklaroi se do të vazhdojë të forcojë mbrojtjen ndaj kërcënimeve ajrore, përfshirë dronët, duke dënuar atë që e cilësoi si papërgjegjshmëri të Rusisë.