DUBLIN – Merz kërkon shkurtime qindra miliardë euro në buxhetin e BE-së

DUBLIN, 28 korrik /ATSH-DPA/- Kancelari gjerman Friedrich Merz ka kërkuar që buxheti afatgjatë i Bashkimit Evropian të reduktohet me qindra miliardë euro krahasuar me propozimin e Komisionit Evropian.

Gjatë një takimi në Dublin me kryeministrin irlandez Micheal Martin, kancelari Merz deklaroi se shkurtime duhet të bëhen në të gjitha fushat e shpenzimeve.

Kancelari gjerman theksoi se këto shkurtime janë të domosdoshme, pavarësisht nëse BE-ja arrin të sigurojë burime të reja të ardhurash. Sipas tij, rritja e propozuar e buxhetit nuk është e balancuar dhe nuk mund të pranohet nga Gjermania.

Komisioni Evropian ka propozuar një buxhet prej rreth 1,76 trilionë eurosh (me çmimet e vitit 2025) për periudhën 2028–2034. Fondet do të përdoren për mbrojtjen, politikën bujqësore, fondet e zhvillimit rajonal, programin Erasmus dhe prioritete të tjera të BE-së.

Si ekonomia më e madhe e Bashkimit Evropian, Gjermania është kontribuuesi më i madh në buxhetin e përbashkët, çka e bën Berlinin veçanërisht të ndjeshëm ndaj rritjes së shpenzimeve./  /Ad.Ab./ a.jor.