Dy të vrarë nga mbetjet e dronit të interceptuar që synonte fushën e naftës Shaybah në Arabinë Saudite

Mbrojtja ajrore e Arabisë Saudite rrëzoi të mërkurën një dron që po tentonte të godiste fushën e naftës Shaybah të kompanisë Aramco, në Provincën Lindore të mbretërisë, por mbetjet e dronit të interceptuar vranë dy persona dhe plagosën dy të tjerë, siç njofton Al Jazeera, duke cituar Ministrinë saudite të Energjisë.

Sipas ministrisë, viktimat janë një shtetas filipinas dhe një nepalez, ndërsa të plagosurit janë një shtetas pakistanez dhe një indian. Copëzat e rëna i vunë zjarrin edhe një automjeti të një kontraktori jashtë perimetrit të objektit, por ministria theksoi se sulmi nuk pati asnjë ndikim në operacionet e fushës së naftës, e cila ndodhet pranë kufirit me Emiratet e Bashkuara Arabe.

Ministria e Energjisë nuk bëri të ditur se kush e lëshoi dronin. Më herët të mërkurën, koalicioni i udhëhequr nga Arabia Saudite në Jemen raportoi se kishte interceptuar gjashtë dronë, në një tjetër ditë sulmesh ndaj territorit saudit.

Arabia Saudite është përballur këtë muaj me sulme pothuajse të përditshme nga Huthi-t e mbështetur nga Irani, përfshirë një goditje ndaj aeroportit ndërkombëtar të Riadit, e përshkruar si më vdekjeprurësja në mbretëri prej vitesh, ndërsa lufta mes koalicionit saudit dhe Huthi-ve po përshkallëzohet paralelisht me konfliktin SHBA–Iran.