Dyshohet se mori 300 mijë lekë ryshfet, Gjykata lë në burg prokurorin Vukaj

“Arrest me burg” është masa që Gjykata e Krimeve të Rënda, Tiranë ka dhënë për prokurorin Petrit Vukaj, i cili një ditë më parë u arrestua për konsumimin e veprës penale “Korrupsioni pasiv….i prokurorit…”.

Dyshohet se prokurori me detyrë në Prokurorinë e Fierit, nëpërmjet ndërhyrjes korruptive të disa personave, ka marrë përsipër zbutjen e kërkesës për dënim e shtetasit Elton Xhemali, i paraburgosur për veprën penale të “Shkeljes së rregullave të qarkullimit rrugor”, ngjarje e ndodhur në datë 31 mars 2015, në aksin rrugor Levan-Tepelenë, me pasojë vdekjen e qytetarit Përparim Bizhga, Shef i Rendit në Policinë e Delvinës, pasagjer në mjetin e drejtuar nga i arrestuari Xhemali.

Për vendimin që do të merrte, Vukaj do të shpërblehej me 300 mijë lekë të reja.  Pas ndërhyrjes së dyshuar korruptive, prokurori Vukaj, në seancën e datës 07.10.2015 në gjykatën e Fierit, kërkon “dënimin me 2 vjet burgim për të pandehurin Elton Xhemali dhe pezullimin e dënimit e kalimin e tij në shërbim prove”. Kërkesa e prokurorit është pranuar pjesërisht nga ana e gjykatës, e cila vendos “dënimin me 18 muaj burgim”, por duke mos pranuar kërkesën e prokurorit për pezullimin e dënimit.