E treta e vërteta, Egnatia “spektakël” ndaj Petrocub dhe shkon për herë të parë në raundin e dytë kualifikues

Pas dy dështimeve rresht në dy vitet e fundit, duke mos u kualifikuar dot për në raundin e dytë kualifikues, Engatia sot ka thyer akullin dhe ka siguruar më në fund biletën për në raundin tjetër.

Rrogozhinasit fituan 6-1 ndaj Petrocub në ndeshjen e kthimit, e para në Moldavi ishte mbyllur në barazim 1-1. Egnatia do të takohet në raundin e dytë me sllovenët e Celje.

Egnatia e nisi vrullshëm takimin duke gjetur golin që në minutën e 2-të, ku pas një goditjeje këndi dhe devijimit të Soumaila Bakayoko, ishte Eneo Bitri i cili shtyu në fund topin në rrjetë.

Në minutën e 30-të, Alessandro Albanese dyfishoi shifrat për rrogozhinasit, me një gol spektakolar pas një goditjeje fantastike nga distanca.

Në minutën e 43-të, Egnatia gjen golin e tretë, falë një autogoli nga Mihail Platica. Ishte braziliani Fernando Medeiros që kroosi nga këndi dhe Platica i pavëmendshëm dërgon me kokë topin në portën e tij, duke vulosur kualifikimin e Egnatias për në raundin e dytë, që në pjesën e parë.

Në minutën e 58-të, Egnatia gjeti golin e katërt pas një topi të humbur nga miqtë. Ishte braziliani Andrey Yago që gjeti rrjetën, pas asistit të Fernando Medeiros.

Në minutën e 63-të, Petrocub gjen golin e nderit me Nicolae Rotaru. Në minutën e 84-të, Bakayoko shënoi golin e pestë për vendasit, pas asistit të Ildi Grudës. Në minutën e fundit të kohës së rregullt, ishte Gruda që gjeti golin e 6-të. Rezultati përfundimtar, 6-1 për Egnatian.